أختار علمي ولا أدبي؟

Question

السلام عليكم... أنا خلصت أولي ثانوي ودلوقتي دخله تانيه بس مش عرفه أدخل علمي ولا أدبي ؟ أنا بحب اللغات وكويسه في المواد العلميه والأدبيه بس أنا بكره الرياضه جدا ومش شطره فيها ودلوقتي علمي شعبه وحده وأهلي عوزني أدخل علمي بس أنا خايفه من الرياضه جدا.... ممكن تساعدوني لأنه أنا محتاره وهو فعلا أدبي ملهوش مستقبل

Answer 1

ده سؤال مهم فعلا علمي ولا أدبي.

اولا ما دام بتحبي ادبي واللغات فانصحك بدخول ادبي.

بالنسبة للمستقبل مفيش حاجه اسمها أدبي ملوش مستقبل سوق العمل بتغير كل شويه ومش زي زمان انا شايف ان المستقبل في مجال الكمبيوتر والحاسبات.

انا كنت زيك كان كله عمال يقول لي ادخل علمي ولكنني صممت ودخلت  أدبي عشان كنت برده بحب اللغات وكان هدفي ادخل كلية السن والحمد لله دخلتها ودرست اللغة الالمانية والحمد لله يوجد كثير من العمل برواتب جيده جدا جدا لمتحدثي اللغة الالمانية.

فانصحك تعملي زيي بس ادرسي الماني في الثانوية العامة عشان ممكن يكون من شروط كلية السن دراسة الالمانيه في ثانوي وكمان مجموع في الانجليزي جيد.

وانصحك بشدة باللغة الالمانية.

في حاجه تانيه ممكن تعمليها لو حابة تدرسي اللغة من غير السن عن طريق الكورسات وتدخلي علمي وتدخلي كلية حاسبات ومعلومات.

حسب مقدرتك ومفيش حاجه مستحية كله بالسعي في ناس مدخلتش  مدارس وبتتعلم لغات عشان عندها إرادة.